Идни настани

Во недела, на 26 јули, во 19:30 часот, во Музејот на град Скопје ќе се отвори изложбата „63 ГОДИНИ – СКОПЈЕ 63“. Автор на изложбата е Зоја Богдановска, кустос советник историчар. Изложбата е подготвена по повод 63-годишнината од катастрофалниот земјотрес кој се случил во Скопје на 26 јули 1963 година и е дел од културната манифестација „Одбележување на 26 јули - денот на катастрофалниот земјотрес во Скопје во 1963 година“. Темата на изложбата е 26 јули, денот на катастрофата. Централното место го заземаат луѓето - сведоци на настанот, нивните емоции, борбата за спасување на сопствениот живот, животите на своите најблиски, како и спасување на животите на своите сограѓани. Текстот на авторот ја следи приказната за изложбата, збогатена со автентични фотографии од првите мигови на катастрофата. 5 часот и 17 минути ќе биде почеток на животни приказни што ќе бидат запишани, некои прераскажани, а други заборавени, бидејќи нема да има кој да ги раскаже. Улиците, плоштадите и парковите станаа засолништа за луѓето во тоа несекојдневно и страшно утро. Изложбата станува дел од новосоздадена постојана поставка сместена во влезната сала во Музејот на град Скопје, нагласувајќи го значењето на музејската зграда како зграда прогласена за споменик на културата во спомен на земјотресот од 26 јули 1963 година.

На 26 јули, денот кога Скопје повторно се навраќа кон својата најдлабока рана, ќе биде отворена изложбата „Архив на тага: Скопје 1963“, со фотографии на Васил Хаџиманов од тажачките обреди по земјотресот и одржана промоција на дополнетото и двојазично издание на книгата „Тажачки песни од скопскиот земјотрес во 1963 г. (Од архивските материјали на Васил Хаџиманов)“/”Laments from the 1963 Skopje Earthquake (From the Archival Materials of Vasil Hadzimanov)” од авторите Ана Мартиноска и Жарко Иванов. Настанот ќе се одржи на 26.07.2026 г. во 20.30 часот во Музејот на град Скопје.
Книгата и изложбата отвораат два влеза во истиот архив: преку зборот и преку фотографијата, преку гласовите на жените што ја оплакувале загубата и преку погледот што ги сочувал нивните лица, движења и обреди. Овие архивски материјали, пронајдени во оставнината на познатиот етномузиколог Васил Хаџиманов, повеќе од шест децении недостапни за јавноста, денес сведочат за тагата како лично искуство, заеднички обред и дел од културната меморија на градот.
Авторски концепт за изложбата е подготвен во соработка со фотографот-документарист Иван Блажев од Архив МАНУ „Харалампие Поленаковиќ“.
Со спојувањето на сликата и звукот, архивскиот материјал добива нова музејска и меморијална форма, а промоцијата на дополнетото двојазично издание станува дел од поширокото одбележување на делото на Хаџиманов.

Во рамките на манифестацијата за одбележување на 63-годишнината од катастрофалниот земјотрес во Скопје (26 јули 1963 година), ЈУ Музеј на град Скопје организира обука „Прва помош за културното наследство“, наменета за музејски професионалци.
Обуката има за цел да ги запознае учесниците со основните протоколи за безбедна евакуација, документирање, тријажа, пакување и прва помош на музејски предмети при кризни ситуации, со акцент на заштитата на движното културно наследство по природни катастрофи.
Обуката се реализира во соработка со Македонскиот национален комитет на Синиот штит и Дирекцијата за заштита и спасување, а е финансиски поддржана од Град Скопје.

27 јули 2026 година (понеделник)
11:00 часот
Прва изложбена сала, ЈУ Музеј на град Скопје

Со оваа обука Музејот на град Скопје придонесува кон зајакнување на подготвеноста на музејските институции за навремена и стручна реакција во услови на кризни ситуации, во насока на заштита и зачувување на културното наследство.